Ака уйăхĕн 22 –
мĕшĕнче калаçăва эпир хамăр хуламăра халалларăмăр. Сăмах Шупашкар çинчен пычĕ.
Пиртен кашниех çапла калама пултарать пулĕ: «Тăван хула – маншăн паха».
Шупашкар
– чăваш халăхĕн тăван çĕр-шывĕн тĕп хули. Эпир Аслă Раççее чунран юрататпăр.
Чăваш Ене те çав туйăмпах, иксĕлми хăватпа саватпăр. Анне пĕртен-пĕрре пулнă
пек, тăван çĕр-шыв та темиçе мар. Эпир тĕнчене чăваш пулса килнĕ, Шупашкар вара
– чăваш чĕри.
«Шупашкар» ят историне темиçе тĕрлĕ ăнлантараççĕ.
Акă пĕр тĕслĕх: «шупаш» - «чăваш» сăмахăн
варианчĕ, «кар» тени çирĕплетнĕ вырăна пĕлтерет, крепость пек япала пулать.
Çапла вара «Шупашкар» чăвашсем пурăнакан хÿтĕ вырăна пĕлтерет.